Glimt frå ei kulturhistorie
Vår 2025: veke 7, 9, 11, 13, 17, 19 og 20.
Omvisingstid: måndag-fredag kl. 9-14
Omvisarar: Anna Kleiva og Vegard Sæle Nævdal
Varar i ca. 60 minutt
I samlinga til Nasjonalbiblioteket finst store delar av det som er publisert for offentlegheita frå 1100-talet og fram til vår eiga tid – manuskript, bøker, filmar, musikk, tv- og radioklipp, plakatar og småtrykk. Samlinga er det felles minnet vårt. I utstillinga Opplyst har vi henta nokon av desse viktige og spektakulære objekta fram i lyset. Dei representerer augeblikk i den felles historia vår, og fortel om store gjennombrot, kreative meisterverk og avgjerande hendingar som har forma ytringsrommet og nasjonen vår.
I Glimt frå ei kulturhistorie får elevane ei generell kulturhistorisk omvising i Opplyst. Dei får også ei innføring i Nasjonalbiblioteket sitt arbeid. Kva slags materiale samlar vi på? Korleis digitaliserer vi? Korleis kan elevane sjølve bruke Nasjonalbiblioteket sine tenestar?
Klassa blir delt i to under besøket, og begge grupper deltek på omvising og eit kort undervisningsopplegg.
Besøk med minoritetsspråkleg klasse
Omvisinga i Opplyst går føre seg på norsk, men vi har utstillingskatalogar på både polsk, spansk, fransk, tysk, somali, arabisk og engelsk, i tillegg til norsk og samisk; desse kan vere til hjelp både under og etter besøket. Gi gjerne beskjed om det er aktuelt for klassa dykkar. Katalogane er gratis.
